He e-ram portal hi Ministry of DoNER, Science & Technology Section fund 6.4 crores atanga thawh niin, a bultan nan pilot project angin Aizawl district hnuaia land record leh process te kalpui phawt a ni a.

In hmun dilna, periodical patta, land lease, house site leh hming thlak tea bultan a ni. Vawiin thlengin e-ram online kaltlanga hengte hi tih vek a ngaih avangin eng emaw kawng zawng tak chuan a awlsam tih a sawi theih ang.

Revenue department dawr tute hi a tlangpuiin nu leh pa, kum upa lam zawk an ni deuh a, online kaltlanga tih neuh neuh ngai atam avangin buaina an tawk nasa a, a tam zawk chuan Common Service Center (CSC) kaltlangin he office hi an dawr.

Tun hnaiah e-ram online portal hi a chhe deuh reng a, a that pawhin ni hnih khat hnuah hman hleih theilohin a awm fo a, offline a office dawr awmzia a tam loh avangin e-ram hmangtu an buai phah hle a ni.

"Kan kum a lo tam ve ta a, mahni ngei in lan te a ngaih thin avangin veng hla tak atangin Revenue office dawra chhuah a ngaih chang a tam a, e-ram online portal a hman theih thinloh avangin tha kan seng thlawn hnem tawh lutuk.." tiin Revenue dept dawrtu pakhat chuan Zoram Today a hrilh.

Hetiang lam buaipui thin Real Estate leh Firm pakhata thawk chuan, " e-ram hi  kar hnih thum chu a ni tawhin ka hria, kan hmang hleithei lova, hming thlak, LSC dilna engkim mai hi online portal hmanga tih angaih avangin buaina kan tawk a, hna kan thawk hlei theilo, min dawr thin tute an zahawm thei hle,' a ti bawk.

Zoram Today hriat danin tunlaia e-ram online portal hman hleih theiloh avangin LSC, House pass a hmingthlak duh leh siam thar turte pawh department ah an in lan hleithei lova, interview-na hmun a thawl in Revenue office dawr thinte pawh an kiam phah nasa niin a hmu.